Rugira itatse ubudashyikirwa,

Ndate Umwami w’ubudahinyuka,

Utetse mu ngoma z’ubutsinzi

4 Ziremye ubwiru zihatse ubwenge,

N’ubutabera n’ubutareshywa,

N’ubudahendwa n’ubudahindwa,

N’ubudasubira n’ubutayoba,

8 N’ubudaheranwa n’ubudahemuka.

N’ubutabalika n’ubutaganzwa,

N’ubujijuke n’ubudasobanya,

N’ubutalindagira b’inyange,

12 Rugira yonyine ikabihorana.

Umunsi itsinda ba Shitani,

Igaha abayoboke ikamba lyera.

Ubwo batabarutse bâganje,

16 Ijya mu ihangiro lya kabili.

Imanuka ku ijuru iteze urweru,

Impundu ziravuga urwanaga

Kuko iteruye kurema ibintu,

20 Ukoraho ukabyumvira umubili.

Abamalayika bashika iyo bava.

Barabirimbira barakorana,

Amatsiko menshi barayatyaza.

24 Bateze uko Immana izâhanga.

Iya-kare ibonye bafite ubwuzu,

Ibambikaho urwoga rw’ibiroli

IJAMBO lyayo lilizihirwa,

28 Ibyiteguwe lirabihimba.

Ibanza kurema ikintu kinini,

Kirumbâza ubuheza-nkiko,

Ibara n’indeshyo, ubugali bwacyo,

32 Nta rugero byabona rw’ubu.

Abamalayika bakikirabukwa,

Ni abasore b’i Bwami bawe,

Baragiharara bagikiniraho,

36 Umwanya Rurema ikikinogereza.

Umunsi wa mbere mujya mwumva.

Ubwo arawutangira bugisêsa,

Amageza ahorana y’ubutabalika,

40 Ayashyira muli nyamugaza-nkiko.

Agifinda amagara mo urushingo,

Arahembera arugira inkongi,

IJAMBO lyagenewe guhanga,

44 Lirabigenga ubudakiranirwa.

Umuliro wogoga nyamunini,

Umubili wose gishya ururimbi,

Inkongi icyunyuguzamo ububisi,

48 Kiratokombera kirasâgwa.

Ikibatsi kije guhinguranya,

Ijisho ly’urumuli lijya hanze,

Ijuru likwiramo icyézézi,

52 Ijuli lihimukira urukéra,

Urumuli na mwe uko mubirûzi,

Ntirwahanzwe icyuzuliraho,

Immana yitonze birambye,

56 Imyaka irenga uduhumbagiza.

Umenye ko imyaka uburo buhûye,

Ali ubusàbusa kuli Rurema ;

Nâho byashyika miliyoni,

60 Bikaba nk’umusenyi w’inyanja.

Immana ibinganya inzozi zihita,

Ibona ko ali akanya kanzinya,

Nk’iyo uhumetse limwe lisa,

64 Kwumva uko irora biraturuhije.

Dore iyo mwumva muli Bibiliya,

Ngo yihase gukora ibiremwa,

Iminsi itandatu irabisoza,

68 Umubyizi ni imyaka uduhumbi.

Ntimugakêke bya Rubanda,

Ngo ni iminsi nk’iyi tulimo ;

Yali ibihe bihimbye ukundi,

72 Ikaba miremire bitanilije.

Naho kubyita iminsi mwumva,

Ali ibihembwe birambiranye,

Immana yigisha ituvanze

76 N’abanyabwenge bucishilije.

Iba ikulikiranye gusa ko twumva,

Ikavuga ijambo kimenya-bose,

Lyumvwa n’abana b’incuke,

80 Kimwe na sekuruza wahwishe.

Ni nde muli twe utumva umunsi

Naho usobanuye by’abahanga,

Ubukulikirane bw’ibyahanzwe,

84 Wacurangira twe abahetsi !

Abake babyumvira mu mashuli,

Akomeye yinjira abanyebwenge,

Bakabitozwa imyaka itabarwa,

88 Inzira zitazashobokera twese.

Ishuli rya rusange tubamo,

Immana irongorora amagambo,

Ikendamo ay’itôto ly’amazi,

92 Yo kuturumbutsa urukundo.

Ngombwa y’Immana nirwo rusa,

Waba agahwishi, waba umuhanga,

Waba n’injiji nka twe rubanda,

96 Ishaka ko uyikunda ngo ikwihe.

Urumuli Immana irushoje umucyo,

Irarunogereza irugira inyange,

Imaze gukaraga cya nyamunini,

100 Ikibungereza ijuru muzunga.

Uko cyihuta igikungagiza,

Kirayihungiza ya nkongi,

Ikigira nk’ubutare mu ruganda:

104 Igihindura urwotsi rw’umuliro.

Uko cyiyungiranyamo imbaraga,

Kititanyuraho ibimanyu,

Kilipfuragura cyimisha,

108 Kirabijuguta cy’ilya dondi.

Ibisate ngo bikwire imishwaro,

Ali uruhuli runyuragirana,

Arabirobanura Nyili -ibiremwa,

112 Abiha ibikingi, imiyira dede.

Kimwe agihimba kwitwa Izzuba

Ikindi kiba isi tuzatura,

Icya gatatu agihimba ukwezi

116 Ibyitaruye biba Inyenyeli.

Henga mvire limwe ruhande,

Nsubize ikibazo umutangilizo ?

Igihe cy’ishwara bibaru,

120 N’isi yakiranaga inkongi.

Ubwo urwokotsi rugacucumuka,

Rukayikîkiza mu kirere,

Nyamara ntirukoranemo amazi,

124 Ali ugutêsheranywa n’icyunzwe.

Uko bucya umuliro ugenda uhwâma,

Ubukana bwawo buradohôka ;

Immana ishyiraho bwa bugenge :

128 Ibicu irabiremya birêgerana.

Imbeho ayituliyemo birakonja ;

Bimaze kwikwiza uruyumbu,

Maze ibirêtêshamo amazi,

132 Imvura y’ubuliza irahangamuka.

Indoha yahungira wa muliro,

Bicucumukamo urwokotsi,

Rwatutumba rugana mu bicu,

136 Rukaharêta imvura igashoka.

Ijuru no ku butaka birabudika,

Umuliro ku isi uharushwa amaboko,

Amazi ahoberana uruvange,

140 Abyara umwijima wapfukiliye.

Umunyotwe walicitseho mwinshi,

Ujya kwipfulika mu nda y’isi ;

Iyo nkekwe ituye mu mizi yacu,

144 Haba ubwo ivubulira mu burunga.

Amazi ashumbilije atyo umuliro,

Isi iheba kwimulikira ubwayo :

Immana ikabishakamo interuro,

148 Yo kwâtûra amanywa n’ubwire.

Itegeka izzuba kumulikira isi,

Urumuli lirasa irwita Umunsi ; N

Naho birindi litarasiraho,

152 Iyita Ijoro ntibyavuguruzwa.

Immana irebye uko yabigenje,

Isanga nta kibiruta ubwiza,

Umunsi wa mbere uragoroba,

156 Rugira yiruhutsa umulimo.

Imyaka byamaze ntituyizi,

Wenda byaba za miliyoni ;

Nyamara Mungu abyita umunsi

150 Agilira banyamwinshi muli twe :

Ngo ntitubwirwa ibidatanilije,

Ubwenge bwigunitse bubyumve

Ntiyasobanura nk’umuhanga,

164 Uvuga ibihanitse bikaturenga,

Nkunda Immana idakangata,

Itavuga mubigambo bikakaje,

Ikareka bya rwahindira,

168 Igahitamo kwumvwa n’uwenze,

Nk’uko mama yahoze agenza,

Nkili umwana utazi na busa,

Antoza urwe rukundo mu twanjwe,

172 Namwigâna akanyurwa

Rugira rwamuhaye uwo muco,

Ni ko idutoza amahame y’ireme,

Ngo uzabyemera akayikunda, 176 Imugire Ingoro ituyemo Imana