Rugira isendereza imisizi,

Iya rusibuka iroha ubugingo,

Ndate Immana iharaze ubwiza,

4 N’ubutabeshywa n’ubudashoborwa.

N’ubudasumbanya abayisanga,

N’ubudakangaranya abatindi,

N’ubudashobeza abashumbilijwe,

8 N’ubudasûbiza abâgilijwe.

N’uruvuto rutera ko ikundwa,

Ikabyiyamizamo ubudahwema,

Ihendahenda imbaga ya Muntu,

12 Ngo bemere ko ibashyira i Gorora.

Umunsi Immana isoza imilimo,

Bwarakeye uba uwa Karindwi,

Ali wo gihembwe cy’imperuka,

16 Rurema itaruhuka irasengwa.

Ibiremwa birakorana likirasa,

Biva mu myobo no mu mashyamba,

Biba igikumba ku gasusuruko,

20 Bilyitaragazaho urugêra.

Muntu nawe abizindukiramo,

Abihitagiramo urujya n’uruza,

Nk’uko mu batunzi bigenda,

24 Baza kuzireba likirasa.

Abyitegereza amabara n’umuco,

Agira ati «Uli intare y’umugara,

Na we uli ingwe y’urunyamabara,

28 Na we ukaba inzovu irumbaraye.

Arabihetura abyita neza;

Inyoni ikagurukana imbyino zayo,

Umuyaga uhungabanya amashyamba,

32 Intare igatontomana ubukaka.

Impfizi ziraroha ubudahosha,

Imbyeyi kandi ziravumera,

Birasakabaka biba nk’iguliro

36 Usangwa ali indimi zidahuye.

Biba uruhogerane rw’inyanja,

Biba uruvange rukuza Immana.

Ibiremwa birayogeza mu majwi,

40 Na yo bihimbaje irabyumva.

Ibwira Muntu arayipfukamira,

Iti : «Ibi bisimba bihogerana,

Birandata mu majwi biroha,

44 Byo ntibiyumvemo na ruminja !

Wowe Buguru-bubili nyabwenge,

Mugenga w’ibyuzuye mu si,

Ukaba n’urumuli rubilirimba,

48 Senga Rurema aho bitamwumva.

Ibiremwa by’uburanga nahimbye,

Ubwiza nabiteye bw’iharuza,

Bukuvugiremo mbukumviremo,

52 Urate Iya-mbere lntayoberana.

Immana irangije ayo magambo,

Muntu ashinga ivi arabiterura,

Ati : «Rurema, Ruhanga- bugingo,

56 Urakadutunga, urakaduhorana !

Biremwa yikoreye ku bwende,

Nimumusingize uko muhimbye,

ZZUBA ly’umweru usa n’ingwa,

60 Urate Immana ikugira inyange !

Yo yagukwijemo n’ubushyuhe,

Ukaba udatinya imbeho n’umuyaga,

Ntujye kwota umuliro w’inkwi,

64 Ngo ugorwe no kwasa amashyamba.

Na we UMUNSI w’umucyo ukeye,

Urate Iyahanze umutaga,

Iya-kare ivanaho ijoro ukabaho,

68 Urowe n’iryererana ly’ihangu

Rurema ashatse kulizibiranya,

Igihe cyo kurasa ligaca ahandi,

Ubwawe warasa ukaba umunsi,

72 Wabuze izzuba likubonesha ?

Unyumve wa JORO we ly’ubwire

Urate Iyagutatse ubutsilili ;

Rurerna-bintu itakurinda,

76 Ngo yuhure umutaga ukubise.

Wajya hehe, wapfa uruhe ?

Izzuba lyacana ugashoberwa,

Ugapfa buheliheli ubutagaruka

80 Shima Rurema iguha kurara.

Iguha gutangira bugorobye,

Inzira ukayerekwa n’ukwezi,

Ukagabagabanya ibitotsi abantu,

84 Ukabibakwiza bali ku bulili.

Nawe KWEZ1 urate Immana,

Ihora igukongeza iyo bwije,

Bikakurinda gutsîtâra,

88 Ukaranga amagingo y’imyaka.

N’INYENYELI Abutabalika,

Namwe nimurate Iyabalemye ;

Umubare wanyu ni nk’umusenyi,

92 Abe ali ko muyisenga muhirwe.

Mvura itunyagira y’umulindi,

Ituruka hejuru iyo tutazi,

Urate ukwuzuzayo mu maliba,

96 Igihe yashakiye ikagusesa.

Nawe UMU t’AGA ruhûhêra.

Urate Iyaremye umwuka unyuramo,

Amashami uhungabanya n’ibyatsi,

100 Ubihebye wabaho bigashoboka ?

Nawe MBEHO ya rutitimishe,

Rata Immana iguha gukonja,

Itakurinda izzuba lyotsa,

104 Icyunzwe lirasa wakinyura he ?

Bwa bushyuhe buguhahiliza,

Busâgiranye isi wamera ute ?

Urate Rurema iguha ubugingo,

108 Uyishimire ko ikinga ukuboko.

Na mwe iby’isi n’ijuru hombi,

Ibiremwa byishakaje AMABABA,

Ali ibisîga n’inyoni ntoya,

112 Mbanje kwambaza Iyabahanze.

Mwumve inkongoro n’inkona,

Ngaho ibyanira na sakabaka,

Igihe mutamba munyuragirana,

116 Mwese muyisingize Immana.

Injongo, intungura n’ibikona,

Ifundi, n’inyamanza n’isandi,

Umusure, rwungeli, zo n’ishwima,

120 Igugu na matene n’umununi,

Intashya, n’umusamanzuki, n’inyombya,

Igishwi n’inkingi y’izindi nyoni,

Ingurutsi zose z’urunyamanza,

124 Byose nibisingize Immana

Natwe ibiremwa by’ibitaguruka,

Ngaho tuyisingize Rurema,

Isi y’ubukombe ihereza iyo bigwa,

128 Ngaho bimbulira ibikulimo !

Inkiko zawe y’ubutabalika,

Ibihugu n’ibiti, ubutaka, icyatsi,

Amabuye akwuzuye n’umusenyi,

132 Byose nibisingize Immana

Imisozi itumburutse, ibirunga,

Udusozi tuli hasi, utununga,

Itaba n’ibikombe n’imanga,

136 Impinga n’amabanga, imibande.

Imihaga n’imicyamo, imibande,

Utuniga n’imicuro n’utugarama,

Ibitwa bisoza ahateze neza,

140 Byose nibisingize Immana !

Imilima n’imishike n’imikenke,

Amasinde, ibishanga, amashyamba,

 Amasaka n’amashaza n’ibishyimbo,

144 N’ubuhinge n’imyaka n’intôki,

Amayira n’imihanda, imiharuro,

Amabuga y’inka rulyohêra,

Imikuku yimbye, imikoke, inkangu,

148 Byose nibisingize Immana

Inyanja n’imigezi n’inzuzi

Insumo z’urwamo mu mmanga,

Urumira rwihishemo ibizenga,

152 Umwaro ushokeramo ibikôko

Amakera y’urwunyu, amashyûza,

Ibiziba mu nzira n’ibireko,

Ibibumbiro n’amaliba avomwa,

156 Byose nibisingize lmmana !

Amadubi n’amafi y’urujagate,

Imbirizi zibambiye ibyambu,

Imisundwe n’ingaru, inyogaruzi,

160 Akanyamasyo gashôka ibizenga.

Urutoni rwiharaze ubugondo,

Imiga n’ibihura, ibiba ku mazi,

Inzobe zivogera urufunzo,

164 Byose nibisingize Immana !

Intare rutontoma rw’umugara,

Ingwe y’ubugondo rukabya imbaraga,

N’urutarangwe n’isega, inkaraba,

168 Inkaka zôgaga amashyamba !

Inzovu rubunga ibirusha umubili,

Imvubu ku byambu n’inkura isobetse,

Cya gikatirane cy’ihembe,

172 Byose nibisingize Immana !

Imparage iciye ibisoro byera,

Inimba y’urwego n’impongo,

Imbogo zihimbaje umurindi,

176 Indonyi n’inyemera, inkoronko.

Isatura n’inkende n’umuhali,

Imperelyi n’inkwavu n’imondo,

Inyaga, ibinyogote igisamujyonjyo,

180 Byose nibisingize lmmana !

Umugeli wandagaye amashyamba,

Imigana Rurema ahadendeje,

Akaba umushumba uragiye ibyanya,

184 Akenura ayo matungo ubudahuga.

Ibiremwa bindi birumbaraye,

N’ibili hasi binzigînya,

N’ibyo nzabona nyuma y’aha,

188 Byose nibisingize lmmana !

N’iby’i muhira nibimurate,

Nibimusingize ntibisumbwa :

Ihene n’intama nibihaganze,

192 Indogobe z’abahetsi, ifarasi.

Injangwe n’imbwa duhatse mu rugo,

Za rusake n’inkoko n’imishwi,

Itungo rindi ly’umunihîro,

195 Byose nibisingize Immana!

Inka ibiheruke nyina w’Abami,

Ivubura ya nshyushyu iabana,

Ikarema ab’Immana yabonye,

200 Ikazabûnamura bakavugwa 1

Ni yo mubyeyi w’imbaga mpire,

Igira amabere areta ibyera,

Avamo ibilyohera nk’ubuki,

204 Iyo nayo nisingize Immana!

Ndabiherutse Muntu nyirabyo,

Ubiruta, ubihatse nkanabigenga,

Nkabivugira ku Wabingabiye,

208 Na njye ndayisingiza Immana.

Ingabira umwuka ngahûmèka,

Ikampa intambwe ngatambuka,

Ingabira icyezezi nkareba,

212 Izibura amatwi antera kwumva.

Ni yo impa kwicara ngahaguruka,

Ingabira kwiterura nkagenda ;

Nzayirata ijoro n’umunsi,

216 Nzayisingize ubudahwema

Nzalirimbira aho mpagaraye,

Ninjya kwicara mvuze impundu

Nzayisengera aho nalyamye,

220 Ntange bwakeye nkibyuka!

Nzajya nyogereza n’imuhira,

No mu rugendo nyitekereze ;

Nzajya nyishongora bwije,

224 Izzuba nilirasa nyishyiremo

Nzayitura imilimo mporamo,

Nkore tubangikiranye amaso ;

Nzayishimira umucyo impaye,

228 Nzayikundira imvura igusha !

Iteye kuba iliba ly’urukundo.

Nzacuranga nyiculiramo,

Nyireke insàkàremo insage,

232 Mere nk’ingoro ituyemo Immana.